BB60D1AC-3EC2-45E4-9E91-06861780B7B3

Ապրիլը ամիսը մեկնարկեցինք «Ծառզարդար-Զատիկ» նախագծով՝ նախակրթարանի սաների հետ իրականացնելով մի շարք գործունեություններ: Նախագծային առաջին օրը՝ Միջինքի օրը, նախակրթարանի սաների հետ պատրաստեցինք Պահքի գաթան: Զատկի ծեսին ընդառաջ պատրաստեցինք զատկական երաժշտական շրխկաններ: Այնուհետև մի արևային օր դուրս եկանք բակ նկարելու, և սաները բակում նկարեցին գունավոր զատիկներ։ Սաների հետ կատարեցինք ձվով բնագիտական փորձ։ Փորձի ընթացքում տեսանք, թե ինչպես է աղի ջրում ձուն մնում ջրի վրա, իսկ սովորական ջրում ՝ իջնում հատակը։ Ծառզարդարի ծեսին ընդառաջ սաների հետ ձու դատարկեցինք, այնուհետև ներկեցինք: Սաներն այնքան ոգևորված էին, որ գործունեությունը իրականացրել էին նաև ընտանիքում: Այնուհետև զարդարեցինք Հյուսիսի մեր զատկական ծառը: Ծառզարդարին ընդառաջ՝ Հյուսիսային դպրոցի նախակրթարանի սաներն ու ծնողները նույնպես մասնակցեցին ծաղկատունկ-ծառատունկին՝ իրենց հետ բերելով պտղատու ծառերի տնկիներ և խաղողի վազեր: Մեզ այդ հարցում օգնեցին ընկեր Անժելան և վարպետ Հովհաննեսը: Իրականացրինք ածիկացան, սերմնացան: Մեծ Պահքի վերջին շաբաթը կոչվում է Ավագ կամ Մեծ շաբաթ ( ամեն օրն ունի իր անունը և խորհուրդը)։ Ավագ երկուշաբթի օրը սաների հետ ցորեն աղացինք: Երեքշաբթի խնոցի հարեցինք: Պատրաստված կարագի մի մասը անալի թողնելով՝պահել են կճուճներում, որ հինգշաբթի օրը օրհնել տան, այլապես կովերը կաթից կկտրվեն: Ավագ չորեքշաբթի։ Չորեքշաբթի հիմնովին մաքրել ենք խմբասենյակը, ամեն վատ, չար, պիղծ, հիվանդություն, կեղտ «չիք ենք արել»: Ավագ հինգշաբթի վերապատրաստվողի հետ պատրաստեցինք Ակլատիզ: Համեղ կեքսիկներ պատրաստեցինք, որոնք համտեսեցինք Զատկի ծեսին: Էլ ի՞նչ ծես՝ առանց ձվախաղերի: Ապրիլի 26-27-ին մասնակցեցինք Բլեյան կրթական բաց ցանցի ներկայացմանը:

Ծառզարդար-Զատիկ